Arrestohet Eduart Gjikoli gjatë operacionit "Koordinata", zbulohet parcelë me 1000 bimë kanabis dhe armë zjarri në banesë

Fier, 22 qershor 2025 – Një tjetër rast i kultivimit të bimëve narkotike është goditur nga Policia e Fierit në kuadër të operacionit të koduar “Koordinata”. Si rezultat i hetimeve të kryera me metoda proaktive dhe kontrolleve të vijueshme në terren, u arrestua në flagrancë shtetasi Eduart Gjikoli, 48 vjeç, banues në fshatin Pojan.

Sipas njoftimit zyrtar, shërbimet e Komisariatit të Policisë Fier zbuluan një sipërfaqe me 1000 bimë të dyshuara si kanabis, të kultivuara përgjatë kanaleve kulluese në zonën e njohur si “Fushat e fshatit Povelçë”.

Gjatë ndërhyrjes së policisë, Eduart Gjikoli u kap në flagrancë teksa kujdesej për bimët narkotike, dhe menjëherë u vu në pranga. Në vazhdim të veprimeve procedurale, u kontrollua edhe banesa e tij, ku u gjetën dhe sekuestruan:

1 armë zjarri pistoletë,

2 krehëra,

14 fishekë luftarak.

Përveç arrestimit të 48-vjeçarit, u procedua penalisht edhe babai i tij, shtetasi E. Gj., 77 vjeç, i dyshuar si bashkëpunëtor në këtë veprimtari të paligjshme. Materialet në ngarkim të tyre u referuan në Prokurorinë pranë Gjykatës së Shkallës së Parë të Juridiksionit të Përgjithshëm Fier.

Bimët narkotike të gjetura në terren u asgjësuan me anë të djegies, ndërsa hetimet vijojnë për të identifikuar dhe kapur persona të tjerë të përfshirë në këtë rrjet të mundshëm kultivimi dhe trafiku të lëndëve narkotike.

Policia e Fierit njofton se operacioni “Koordinata” do të vijojë pa ndërprerje në të gjithë territorin për të parandaluar dhe goditur rastet e kultivimit të bimëve narkotike. /noa.al