Elbasan, 22 qershor 2025 – Një ditë e trishtë për futbollin elbasanas. Mjeku i dashur dhe shumëvjeçar i ekipit verdh e blu, Zihni Bordi, është ndarë nga jeta në moshën 71-vjeçare, duke lënë pas një boshllëk të madh në zemrat e gjithë atyre që e njohën dhe punuan me të.

Prej vitit 1983, Zihni Bordi i kushtoi jetën klubit të futbollit të Elbasanit, duke shërbyer për afro 40 vite me përkushtim, profesionalizëm dhe njerëzi të rrallë. Ai ishte dëshmitar i momenteve më të lavdishme të skuadrës, përfshirë dy tituj kampionë të Superligës dhe një Kupë Shqipërie, por edhe i periudhave më të vështira, si rëniet nga kategoria dhe degradimi drejt klasave të ulëta.

Por Zihni Bordi nuk ishte vetëm një mjek sportiv – ai ishte shpirti i ekipit, një njeri që nuk reshti kurrë së qëndruari pranë futbollistëve, trajnerëve dhe stafit, si gjatë fitoreve ashtu edhe në humbje. I njohur për thjeshtësinë, përulësinë dhe zemrën e madhe, ai mbeti për dekada një pikë referimi për çdo brez që kaloi nëpër klub.

Shoqata Rajonale e Futbollit Elbasan, përmes një komunikate zyrtare, i ka shprehur ngushëllimet më të sinqerta familjes Bordi, miqve dhe gjithë komunitetit sportiv, duke e cilësuar ndarjen e tij nga jeta si një humbje të pazëvendësueshme për qytetin dhe futbollin elbasanas.

Kujtimi i Zihni Bordit do të mbetet përjetësisht i gjallë si mjek, si njeri dhe si një nga figurat më të ndritura që i dha dinjitet sportit në Elbasan.