Tiranë, 21 qershor 2025 – Dy vëllezër janë arrestuar nga Policia e Tiranës, ndërsa një i tretë është shpallur në kërkim, pasi akuzohen se kanë kanosur me armë zjarri një 30-vjeçar, pas një konflikti për motive të dobëta në rrugën “Tafaj”.

Operacioni policor i koduar “Triangle” u zhvillua nga specialistët e Komisariatit të Policisë Nr. 4 në bashkëpunim me Forcën e Posaçme “Shqiponja”. Si rezultat i këtij operacioni u vunë në pranga Alfred Meta, 41 vjeç, dhe Resmi Meta, 46 vjeç, ndërsa vëllai i tyre, G. M., 45 vjeç, është shpallur në kërkim dhe vijon puna për kapjen e tij.

Nga hetimet paraprake rezulton se tre vëllezërit, pas një zënke të çastit në rrugë me një 30-vjeçar, e kanë kanosur këtë të fundit me armë zjarri. Pas ndërhyrjes së menjëhershme të Policisë dhe kontrolleve të ushtruara në banesat e Alfred dhe Resmi Metës në zonën e Tufinës, u sekuestruan 3 armë zjarri tip pistoletë, municion luftarak dhe një automjet.

Materialet procedurale i janë referuar Prokurorisë së Tiranës për veprime të mëtejshme ligjore.