Përmet, 19 qershor 2025 – Një aksident i pazakontë ka ndodhur sot në qafën e malit të Dhëmbelit, ku një 68-vjeçar është rrëzuar së bashku me kafshën e tij të punës dhe ka mbetur i bllokuar nën trupin e saj. Falë një telefonate emergjente, ai është shpëtuar në kohë nga forcat e ndërhyrjes.

Ngjarja ndodhi rreth orës 12:40, në vendin e quajtur “Qafa e Mënit”, kur Luan Lame, banor i fshatit Lipë, Njësia Administrative Petran, telefonoi policinë duke njoftuar se kishte pësuar një aksident teksa ndodhej me pelën e tij në një terren të vështirë malor.

Sipas hetimeve paraprake, Lame kishte rrëshqitur bashkë me kafshën në një zonë të thyer, ku kjo e fundit e zuri nën trup duke i shkaktuar plagë të rënda. Për shkak të frakturave, 68-vjeçari nuk mundej të lëvizte.

Menjëherë pas marrjes së njoftimit, në vendngjarje mbërritën forcat zjarrfikëse, policia dhe ambulanca. I moshuari u nxor nga vendi i ngjarjes me ndihmën e barelës dhe u dërgua në Spitalin e Përmetit, ku ndodhet jashtë rrezikut për jetën.