Në Pekin, u hap të mërkurën Panairi i 31-të Ndërkombëtar i Librit, ku u paraqitën rreth 220.000 libra nga Kina dhe jashtë vendit.

Mbi 1700 ekspozues nga 80 vende të botës dhe rajone marrin pjesë në këtë ngjarje, e cila do të zgjasë deri më 22 qershor, bën të ditur noa.al duke cituar agjencinë e lajmeve “Xinhua”.

Këtë vit, Malajzia mban vendin si i ftuar nderi në panair.

Më shumë se 20 vende, përfshirë Francën, Gjermaninë dhe Japoninë, kanë ngritur stenda kombëtare ekspozuese në panairin e librit.

Shtëpitë botuese ndërkombëtare më të njohura, si Springer Nature, Penguin Random House, Wiley dhe mbi 20 të tjera, kanë marrë pjesë fizikisht në aktivitet, duke paraqitur një përzgjedhje të kujdesshme librash në gjuhë të huaja.

Panairi i librit vë në pah edhe botimin digjital, ku kompani të mëdha kineze si Tencent, Douyin dhe NetEase prezantojnë arritjet e tyre në fushën e letërsisë online dhe lojërave elektronike.