Moskë- Zëdhënësi i Kremlinit, Dmitry Peskov, ka paralajmëruar se çdo përfshirje ushtarake nga Shtetet e Bashkuara në konfliktin në rritje mes Iranit dhe Izraelit mund të shkaktojë një “spirale të tmerrshme përshkallëzimi”. Komentet e tij u raportuan nga agjencia ruse e lajmeve Interfax, në një moment tejet të ndjeshëm për rajonin dhe diplomacinë ndërkombëtare.

Paralajmërimi rus vjen pas një jave bombardimesh izraelite ndaj objektivave iraniane, që kanë rritur shqetësimin global për një konflikt më të gjerë rajonal. Rusia, që historikisht ka pasur marrëdhënie të afërta me Iranin, por edhe me Izraelin ku jeton një komunitet i madh rusishtfolës po përpiqet të ruajë një qëndrim delikat mes dy aleatëve të saj të ndryshëm.

Presidenti rus Vladimir Putin, duke folur për mediat ndërkombëtare, deklaroi se është ende e mundur të gjendet një “zgjidhje e pranueshme” për të dy palët, duke nënvizuar se zgjidhjet ushtarake vetëm sa rrisin përkrahjen e iranianëve për regjimin e tyre.

“Bombardimet vetëm sa forcojnë mbështetjen e popullit iranian për udhëheqjen e vendit. Duhet shumë kujdes. Por në thelb, unë mendoj se një zgjidhje diplomatike mund të gjendet”, tha Putin.

Kjo qasje e Kremlinit vjen në një kohë kur tensionet janë në kulm, dhe çdo hap i gabuar diplomatik apo ushtarak mund të ndezë një përballje shumë më të madhe në Lindjen e Mesme me pasoja të rënda globale.