Athinë, 19 qershor 2025 – Një avion i kompanisë Carpatair që operonte për AirBaltic u detyrua të kryejë një ulje emergjente në Aeroportin Ndërkombëtar “Eleftherios Venizelos” të Athinës, pasi u shfaq tym në kabinën e pilotit.

Avioni Airbus, që kishte nisur fluturimin nga Athina drejt Rigës me 150 pasagjerë në bord (fluturimi BT6162), u kthye menjëherë pas ngritjes dhe u ul me sukses në aeroportin e Spatës. Sipas burimeve nga televizioni publik grek ERT, ekuipazhi sinjalizoi menjëherë situatën dhe kërkoi leje për ulje emergjente.

Fatmirësisht, të gjithë pasagjerët ndodhen në gjendje të mirë shëndetësore dhe nuk ka raportime për të lënduar. Inxhinierët e kompanisë kanë nisur kontrollin teknik të avionit për të zbuluar shkakun e problemit. Ndërkohë, operimet në aeroport vijojnë pa ndërprerje.