“Drogën nuk e shpikëm ne” – Ylli Manjani reagon ashpër ndaj perceptimit të shqiptarëve si fajtorë për tregun europian të drogës

Tiranë, 18 qershor 2025 – Ish-ministri i Drejtësisë, Ylli Manjani, ka reaguar me tone të forta përmes një analize të publikuar në rrjetet sociale, ku kritikon ashpër mënyrën si mediat, politika dhe institucionet shqiptare po i trajtojnë shqiptarët në raport me trafikun e drogës në Europë.

Në një koment të titulluar “Droga, droga…”, Manjani ngre pikëpyetje të forta mbi logjikën e përdorur nga media dhe autoritetet kur e paraqesin Shqipërinë si qendër të trafikut të drogës drejt Bashkimit Europian, ndërkohë që – sipas tij – kërkesa masive për drogë buron nga vetë konsumatorët europianë.

“Në hapësirën e BE-së jetojnë rreth 500 milionë banorë. Të paktën 100 milionë prej tyre marrin drogë. Këta nuk e blejnë në dyqan, por në treg të zi. Po tregu i zi ku është? Në Europë. Jo në Shqipëri…”, shkruan Manjani.

Shqiptarët, pse fajtorë për mallin që kërkojnë europianët?

Manjani e konsideron të gabuar dhe të padrejtë që një numër relativisht i vogël shqiptarësh të përfshirë në këtë rrjet, të cilët “punojnë me kokë në trastë”, të konsiderohen si furnitorë kryesorë të një tregu që ushqehet nga miliona përdorues europianë.

“Si ka mundësi që shqiptari damkos shqiptarin pse dynjaja malloset në drogë?!”, pyet ai, duke e quajtur këtë një logjikë absurde dhe vetëfajësuese.

Kritika për politikën dhe institucionet shqiptare

Në analizën e tij, Manjani akuzon politikën shqiptare se, në vend që të ofrojë zgjidhje reale si punësim apo alternativa ekonomike brenda vendit, zgjedh të fajësojë vetë shqiptarët për konsumatorët e drogës në Europë.

“Politika jonë fajëson shqiptarët për drogën që kërkojnë të uriturit në Europë e Britani. Po çfarë alternative po iu ofroni në Shqipëri?”, shkruan ai me tone të ashpra.

“Drogën e gjetëm, nuk e shpikëm ne”

Në përfundim, Manjani nënvizon se problemi i drogës është i importuar dhe i kërkuar nga vetë Europa, dhe se shqiptarët nuk mund të mbajnë përgjegjësinë për një varësi që nuk e kanë krijuar vetë.

“Drogën nuk e shpikëm ne. Atë e gjetëm midis europianëve. Nëse duan ta legalizojnë, le ta bëjnë. Por nuk u kemi ne faj që mallosen”, përfundon Manjani.

Deklaratat vijnë në një kohë kur po mbahet një konferencë ndërmjet Prokurorisë Shqiptare dhe partnerëve europianë, e fokusuar pikërisht te bashkëpunimi në luftën kundër trafikut të drogës. Për Manjanin, kjo është një ironi më vete: një samit për mallin që kërkojnë vetë europianët. /noa.al