Një variant i COVID-19, që mund të jetë duke shkaktuar rritjen e fundit të rasteve në disa pjesë të botës, ka fituar një nofkë të re: COVID-i me “fyt si thikë rroje”.

Kjo për shkak se varianti — NB.1.8.1, ose “Nimbus” — mund të shkaktojë dhimbje shumë të forta të fytit. Kjo simptomë është identifikuar nga mjekë në Mbretërinë e Bashkuar, Indi dhe vende të tjera, sipas mediave në ato shtete.

Simptoma të tjera të COVID-19, pavarësisht variantit, përfshijnë temperaturë, të dridhura, kollë, vështirësi në frymëmarrje ose humbje të shijes apo nuhatjes.

Ekspertët thonë se nuk ka ndonjë arsye të madhe për shqetësim lidhur me variantin Nimbus, por ja çfarë tjetër duhet të dini për të:

—

Ku po përhapet varianti që shkakton “fyt si thikë rroje”

Sipas Organizatës Botërore të Shëndetësisë (OBSH), rritja e rasteve në fund të muajit të kaluar është përqendruar kryesisht në rajonet e Mesdheut Lindor, Azisë Juglindore dhe Paqësorit Perëndimor. Varianti i ri arriti të përfaqësojë gati 11% të mostrave të sekuencuara globalisht në mesin e majit.

Kontrollet në aeroporte në Shtetet e Bashkuara zbuluan variantin e ri tek udhëtarët që mbërrinin nga këto rajone në destinacione si Kalifornia, shteti i Uashingtonit, Virxhinia dhe Nju Jorku.

—

Nuk ka gjasa që të sëmuresh më rëndë nga ky variant krahasuar me të tjerët

Të paktën deri tani.

OBSH tha se disa vende në rajonin e Paqësorit Perëndimor kanë raportuar rritje të rasteve dhe shtrimeve në spital, por deri më tani nuk ka asgjë që të sugjerojë se sëmundja e shkaktuar nga ky variant është më e rëndë krahasuar me variantet e tjera.

—

Vaksinat kundër COVID-19 janë efektive edhe kundër variantit Nimbus

Po.

OBSH e ka klasifikuar variantin Nimbus si një “variant nën vëzhgim” dhe e konsideron rrezikun për shëndetin publik në nivel global si të ulët. Vaksinat ekzistuese pritet të mbeten efektive.

Ndërkohë, Sekretari i Shëndetësisë, Robert F. Kennedy Jr., njoftoi muajin e kaluar se vaksinat kundër COVID-19 nuk rekomandohen më për fëmijët e shëndetshëm dhe gratë shtatzëna — një vendim që u vu menjëherë në pikëpyetje nga ekspertët e shëndetit publik. /noa.al me të dhëna nga AP