Kërkohej nga drejtësia për ndihmë në kalim të paligjshëm të kufirit – kapet në Hanin e Hotit 51-vjeçari nga Shkodra

Policia Kufitare ka intensifikuar kontrollet në pikat kufitare për të parandaluar krimet ndërkufitare dhe për të kapur personat në kërkim. Si rezultat i operacioneve të shtuara dhe informacioneve të siguruara nga inteligjenca policore, u finalizua me sukses kapja e një shtetasi të shpallur në kërkim kombëtar.

Në Pikën e Kalimit Kufitar Hani i Hotit, shërbimet e Drejtorisë Vendore për Kufirin dhe Migracionin Shkodër bënë të mundur arrestimin e Fatos Hasaj, 51 vjeç, banues në fshatin Vrakë, Shkodër. Ai u ndalua teksa tentonte të largohej nga territori i Republikës së Shqipërisë.

Nga verifikimet rezultoi se ky shtetas ishte shpallur në kërkim nga autoritetet gjyqësore, pasi Gjykata e Shkallës së Parë e Juridiksionit të Përgjithshëm Gjirokastër i kishte caktuar masën e sigurisë “Arrest në burg”, për veprën penale “Ndihma për kalim të paligjshëm të kufijve”, sipas Kodit Penal.

Pas ndalimit, 51-vjeçari iu dorëzua Drejtorisë Vendore të Policisë Gjirokastër, ku do të ndiqen procedurat e mëtejshme ligjore.

Policia Kufitare rithekson angazhimin e saj për garantimin e sigurisë kufitare dhe për kapjen e personave në kërkim, duke bashkëpunuar ngushtë me agjencitë e tjera ligjzbatuese. /noa.al