Ottawa, 17 qershor 2025 – Një episod i pazakontë gjatë samitit të G7 në Kanada është bërë viral në rrjetet sociale, ku protagonistë janë presidenti francez Emmanuel Macron dhe kryeministrja italiane Giorgia Meloni.

Gjatë një diskutimi në tryezën e rrumbullakët mes liderëve botërorë, Macron është filmuar teksa afrohet dhe i pëshpërit diçka në vesh Melonit, duke vendosur dorën përpara gojës për të shmangur leximin e buzëve nga kamerat.

Reagimi i menjëhershëm i Melonit, një shprehje befasimi e ndjekur nga një buzëqeshje, ka ndezur rrjetin, me shumë përdorues që spekulojnë për përmbajtjen e asaj që u tha. Momenti është shpërndarë gjerësisht me komente të ndryshme, ku disa e cilësojnë si një "moment flirtues diplomatik", ndërsa të tjerë e shohin si një shenjë të marrëdhënieve të ngushta mes dy liderëve.

Deri tani, nuk ka pasur asnjë reagim zyrtar për përmbajtjen e bisedës, por videoja mbetet një nga momentet më të komentuara të samitit.