GREQI – Prindër bullgarë lënë foshnjën 11-muajshe në ballkon dhe flenë brenda, arrestohen nga policia

Një ngjarje e rëndë është regjistruar në Greqi, ku dy prindër me shtetësi bullgare u arrestuan pasi lanë foshnjën e tyre 11-muajshe vetëm në ballkon, ndërsa vetë shkuan të flinin të pashqetësuar brenda banesës.

Të qarat e foshnjës në orët e para të mëngjesit të së hënës tërhoqën vëmendjen e një patrulle policie që po kalonte pranë ndërtesës në qendër të qytetit.

Oficerët vendosën të kontrollonin dhe, kur arritën në apartament, u tronditën kur panë foshnjën vetëm në ballkon, me dyert e mbyllura, ndërkohë që dy prindërit flinin me tre fëmijët e tjerë brenda.

Sipas mediave vendase, pamjet e ngjarjes janë regjistruar nga një fqinj, ku shihet fëmija në karrocë dhe i mbuluar me një batanije, në ballkonin e katit të katërt të pallatit.

Ndaj prindërve është ngritur padi për ekspozimin ndaj rrezikut të një të mituri, ndërsa sipas burimeve hetimore, ata kanë pretenduar se e kishin lënë fëmijën në ballkon “për t’u freskuar”. Autoritetet greke po vazhdojnë hetimet për të përcaktuar nëse rasti do të kualifikohet edhe si neglizhencë prindërore.