Operacioni policor i koduar “The Wanted” ka çuar në kapjen e shtetasve të shpallur në kërkim ndërkombëtar.

Në bulevardin “Bajram Curri” në Tiranë u arrestua shtetasi shqiptar Bledar Bedini, i njohur edhe me emrin Bledar Imami, 54 vjeç, i cili ishte në kërkim ndërkombëtar nga autoritetet italiane.

Operacioni u finalizua nga Seksioni i Kërkimit në bashkëpunim me Interpol Tiranën dhe Interpol Romën, pas një shkëmbimi të koordinuar të informacionit.

Bedini është dënuar nga Gjykata e Milanos me 7 vjet burg për “Importim dhe mbajtje të lëndëve narkotike”, vepra të kryera në kuadër të një organizate kriminale që vepronte në Itali.

Aktualisht, Interpol Tirana është në procesin e përfundimit të procedurave për ekstradimin e tij në Itali, ku do të vuajë dënimin e dhënë nga drejtësia italiane. /noa.al