Mjeku i akuzuar për furnizimin e aktorit të ndjerë Matthew Perry me ketaminë në muajin para vdekjes së tij do të deklarohet fajtor, sipas një marrëveshjeje të depozituar në gjykatë të hënën.

Dr. Salvador Plasencia ka rënë dakord të pranojë fajësinë për katër akuza për shpërndarje të ketaminës, sipas dokumentit të firmosur në Gjykatën Federale në Los Angeles. Në këmbim të kësaj, prokurorët kanë pranuar të heqin dorë nga tri akuza të tjera për shpërndarje dhe dy akuza për falsifikim dokumentesh.

Sipas prokurorëve federalë, marrëveshja e fajësisë mund të çojë në një dënim maksimal prej 40 vitesh burg, ndonëse dënimi përfundimtar do të vendoset më vonë. Pranimi zyrtar i fajësisë pritet të ndodhë javët në vijim.

Sipas një bashkëpandehuri, Plasencia i referohej Perry-t si një “idiot” në mesazhe dhe e shihte si një burim përfitimi. Ai ishte një nga objektivat kryesorë të hetimit së bashku me një grua të quajtur Jasveen Sangha, e cila akuzohet se ishte trafikante e ketaminës. Tre të pandehur të tjerë, përfshirë një mjek tjetër, kanë pranuar fajësinë më herët dhe po bashkëpunojnë me drejtësinë.

Sipas dokumenteve gjyqësore, Plasencia i kishte dhënë Perry-t 20 ampula me ketaminë, tableta dhe shiringa, duke filluar rreth një muaj para vdekjes së tij më 28 tetor 2023. Ai gjithashtu e kishte injektuar vetë aktorin në dy raste dhe kishte trajnuar ndihmësin personal të Perry-t, Kenneth Iwamasa, se si ta administronte drogen. Më vonë, ai i kishte dorëzuar Iwamasa-s sasi të tjera ketamine për aktorin.

Plasencia pranoi gjithashtu se kishte përdorur një mjek tjetër, Mark Chavez, për të siguruar substancën. Në një mesazh, Plasencia i shkruante Chavez-it: “Po pyes veten sa do të paguajë ky idiot.” Të dy u takuan në Costa Mesa, ku shkëmbyen disa flakonë me ketaminë. Më pas, Plasencia ia shiti Perry-t për 4,500 dollarë dhe i kërkoi Chavez-it të vazhdonin furnizimin që të bëheshin "burimi i tij i vetëm."

Ndërkohë, Sangha – e vetmja nga pesë të akuzuarit që nuk ka pranuar fajësinë – vazhdon të jetë në paraburgim në pritje të gjyqit. Autoritetet dyshojnë se ishte doza e siguruar prej saj që rezultoi fatale për Perry-n.

Një tjetër i përfshirë, Erik Fleming, mik i Perry-t që shërbente si ndërmjetës dhe transportues i drogës, ka pranuar fajësinë dhe është në bashkëpunim me hetuesit.

Asnjë prej të pandehurve nuk është dënuar ende. Marrëveshja e Plasencia-s nuk garanton ndonjë dënim specifik, por do të peshohet nga gjykata në bazë të bashkëpunimit dhe rrethanave.

Matthew Perry, i njohur në mbarë botën si Chandler Bing në serialin “Friends”, luftonte me varësinë ndaj substancave që në vitet kur ishte pjesë e kastit të serialit. Ai ndërroi jetë në moshën 54-vjeçare dhe autopsia e konfirmoi se ketamina ishte shkaku kryesor i vdekjes. /noa.al me të dhëna nga AP