Disa dhjetëra punonjës të hekurudhës shqiptare kanë humbur vendin e punës, mes tyre ka edhe persona pranë pensionit.

Punonjës të sektorit të mirëmbajtjes së linjës hekurudhore kanë nisur javën e re si zyrtarisht të papunë dhe kanë ngritur zërin mbi këtë situatë, pas një njoftimi verbal të bërë paraprakisht javën e kaluar nga Drejtoria e Përgjithshme e Hekurudhës Shqiptare në Durrës.

47 punonjës janë informuar mbi ndërprerjen e menjëhershme të marrëdhënies së punës, si pasojë e një procesi të shkurtimit të vendeve të punës. Disa prej tyre kanë mbërritur sot në Durrës dhe shprehen të zhgënjyer e të flakur në rrugë pas një jete në hekurudhë.

Ata kanë qenë kryesisht të angazhuar në mirëmbajtjen e linjës hekurudhore të Bajzës, që përdoret kryesisht për transportin e zhavorrit drejt Malit të Zi, me një frekuencë 2-3 herë në javë.

Mes të prekurve nga ky vendim i HSH-së ka edhe punonjës që ndodhen vetëm pak muaj larg daljes në pension, të cilët e kanë pritur me shqetësim dhe zhgënjim largimin e parakohshëm. Sipas tyre, ndërprerja e marrëdhënies së punës ka prekur vetëm sektorin e mirëmbajtjes, ndërkohë që stafi teknik dhe drejtues vijon të qëndrojë në pozicionet e mëparshme.

Punonjësit kërkojnë një zgjidhje për të nesërmen e tyre.