Vizitë e nivelit të lartë në Policinë e Shtetit: BKA gjermane dhe Shqipëria thellojnë bashkëpunimin kundër krimit të organizuar

Tiranë – Drejtori i Përgjithshëm i Policisë së Shtetit, Drejtues Madhor Ilir Proda, priti në një vizitë zyrtare Zëvendëspresidenten e Zyrës Federale Kriminale të Gjermanisë (BKA), znj. Martina Link, e cila shoqërohej nga z. Markus Koths dhe zyrtarë të tjerë të lartë të këtij institucioni prestigjioz gjerman.

Qëllimi kryesor i takimit ishte forcimi i bashkëpunimit ndërmjet dy agjencive ligjzbatuese, veçanërisht në fushën e luftës kundër krimit të organizuar ndërkombëtar. Të dyja palët konfirmuan përkushtimin për të zgjeruar partneritetin, me fokus të veçantë tek hetimet financiare dhe sekuestrimi i aseteve të grupeve kriminale.

Drejtori Proda vlerësoi kontributin e BKA-së në projekte të përbashkëta dhe theksoi rëndësinë e partneritetit strategjik: “Partneriteti ynë është ndërtuar mbi besim dhe transparencë. Krimi i organizuar nuk njeh kufij dhe vetëm përmes aleancave të forta ndërkombëtare mund të arrihet sukses i qëndrueshëm,” – u shpreh ai.

Nga ana e saj, znj. Link vlerësoi rezultatet e Policisë shqiptare dhe theksoi rolin e projektit të përbashkët ORKA, i cili ka rritur ndjeshëm efikasitetin në shkëmbimin e informacionit operacional: “BKA mbetet e angazhuar për të zgjeruar bashkëpunimin dhe do të vijojë të mbështesë trajnimet, sidomos në fushën e krimeve kibernetike dhe financiare,” – deklaroi ajo.

Në takim mori pjesë edhe Drejtuesi i Lartë Neritan Nallbati, i cili kërkoi rritjen e mbështetjes për kapacitete teknike dhe trajnime të specializuara, veçanërisht për hetimin e krimeve në fushën e teknologjisë.

Takimi u pasua nga diskutime teknike mes përfaqësuesve të BKA-së dhe specialistëve të Departamentit të Policisë Kriminale, ku u shqyrtuan iniciativa konkrete për projekte të reja në kuadër të bashkëpunimit dypalësh. /noa.al