Në kuadër të planit operacional kombëtar të koduar “Koordinata”, i cili ka si qëllim parandalimin dhe goditjen e kultivimit të bimëve narkotike, Policia e Fierit ka goditur një tjetër rast të kësaj veprimtarie të paligjshme.

Si rezultat i kontrolleve të pandërprera, të kryera në bazë të informacioneve të siguruara nga inteligjenca policore, shërbimet e Komisariatit të Policisë Fier arrestuan në flagrancë një shtetas në zonën e Roskovecit.

Në pranga ka rënë Flamur Rërëza, 59 vjeç, banues në fshatin Vlosh, i cili u kap duke u kujdesur për 22 bimë të dyshuara narkotike të llojit Cannabis Sativa, të kultivuara në një zonë të pyllëzuar pranë përroit të fshatit.

Bimët narkotike u asgjësuan me anë të djegies nga strukturat e specializuara.

Policia bën me dije se kontrollet intensive në kuadër të operacionit “Koordinata” do të vijojnë edhe në ditët në vijim.

Materialet procedurale u referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.