Presidenti amerikan Donald Trump ka deklaruar se gjatë mandatit të tij të parë ndaloi një konflikt të armatosur mes Serbisë dhe Kosovës, duke kritikuar pasardhësin e tij, Joe Biden, për dështimet në politikën e jashtme në rajon.

Në një postim të gjatë në platformën e tij Truth Social, Trump shkruan:

“Gjatë mandatit tim të parë, Serbia dhe Kosova ishin shumë pranë luftës, siç kanë qenë për dekada me radhë. Unë e ndala atë.”

Ai e lidh përshkallëzimin e tensioneve në Ballkan me veprimet e administratës Biden, të cilat i cilëson si “vendime të pamenduara” që kanë “dëmtuar perspektivat afatgjata” të paqes.

Trump rikujton marrëveshjen e Uashingtonit të vitit 2020, të ndërmjetësuar nga administrata e tij, që kishte në qendër normalizimin ekonomik mes Prishtinës dhe Beogradit, si një sukses diplomatik i tij.

Në të njëjtin reagim, Trump përmend edhe rolin e tij në zbutjen e tensioneve mes Egjiptit dhe Etiopisë për lumin Nil, si dhe mes Indisë dhe Pakistanit, përmes presionit ekonomik amerikan.

Ai mbyll postimin me një mesazh optimist për Lindjen e Mesme:

“Së shpejti do të kemi PAQE mes Izraelit dhe Iranit! Shumë telefonata dhe takime po ndodhin. Unë bëj shumë, por nuk më jepet kurrë merita — s’ka problem, populli e kupton.”

Deklaratat e Trump vijnë në një moment të tensionuar në arenën ndërkombëtare, mes përshkallëzimit të konfliktit Iran-Izrael dhe sfidave të vazhdueshme në Ballkanin Perëndimor.