Botë, 13 qershor 2025 – Tregjet globale të energjisë kanë reaguar menjëherë pas sulmit të Izraelit ndaj Iranit, duke shënuar një rritje të ndjeshme të çmimeve të naftës. Kontratat e naftës referuese Brent Crude dhe Nymex Light Sweet janë rritur me mbi 10%, në një nga lëvizjet më të forta të muajve të fundit.

Sipas mediave ndërkombëtare, njoftimi për goditjen izraelite ka shkaktuar shqetësim të madh te tregtarët, të cilët frikësohen se një përshkallëzim i mëtejshëm i konfliktit midis dy fuqive rajonale mund të rrezikojë furnizimet me naftë nga Lindja e Mesme – një rajon kyç për prodhimin global të energjisë.

Analistët paralajmërojnë se tensionet në rritje mund të sjellin jo vetëm probleme për furnizimin, por edhe pasoja ekonomike për konsumatorët anembanë botës. Rritja e çmimit të naftës së papërpunuar ka ndikim të drejtpërdrejtë në koston e produkteve të përditshme, nga ushqimet në supermarkete deri te karburanti për automjetet.

Sipas burimeve të BBC-së, tregtarët e energjisë janë tani në pritje për të parë nëse Irani do të përgjigjet ushtarakisht në ditët në vijim, gjë që mund të çojë në një krizë të re rajonale me ndikim të gjerë global.