Edhe pse paragjykimet që lidhen me të premten e 13-të nuk janë aq të vjetra sa vetë njerëzimi, mitet dhe simbolika rreth kësaj date janë rrënjosur thellë në kulturën moderne. Në vitin 2025, kjo ditë e konsideruar “ogurzezë” ndodh vetëm një herë, pikërisht më 13 qershor, çka për shumë njerëz e bën edhe më të veçantë, madje edhe shqetësuese.

Një nga teoritë më të përmendura për origjinën e frikës nga kjo datë na çon në Mesjetë, në vitin 1307, kur më 13 tetor, të premten, mbreti francez Filip IV urdhëroi arrestimin masiv dhe ekzekutimin e Kalorësve Templarë. Për shumë studiues të folklorit, kjo ngjarje ka ndikuar në krijimin e perceptimit të së premtes së 13-të si ditë fatkeqësie.

Edhe tradita e krishterë ka luajtur një rol të rëndësishëm në forcimin e këtij simbolizmi. Sipas besimit, në Darkën e Fundit ishin 13 persona, ndërsa kryqëzimi i Jezusit ndodhi të premten. Kombinimi i numrit 13 me këtë ditë të javës u shndërrua me kalimin e kohës në një simbol oguri të keq.

Pavarësisht nëse i besoni apo jo këtyre paragjykimeve, folklori popullor ka ndërtuar një listë të gjatë veprimesh që “duhet të shmangen” në këtë ditë. Disa nga më të njohurat janë:

– Kalimi nën shkallë, që sipas traditës së hershme krishtere shihet si shkelje e simbolit të Trinisë së Shenjtë.

– Macja e zezë që të pret rrugën, veçanërisht nëse kalon nga e majta në të djathtë, çka sipas besimit sjell fat të keq.

– Thyerja e pasqyrës, që mendohet se sjell shtatë vite fatkeqësi.

– Derdhja e kripës, e cila “neutralizohet” duke e hedhur mbi shpatullën e majtë.

– Hapja e çadrës brenda shtëpisë, që besohet se sjell grindje dhe konflikte.

Po ashtu, sipas besimeve popullore, nuk këshillohet të ngrihesh nga shtrati me këmbën e majtë, të veshësh fillimisht çorapen e majtë, të përdorësh lugën e dikujt tjetër apo të hapësh gojën pa e mbuluar me dorë – të gjitha këto shihen si shenja oguri të keq.

Edhe pse për shumëkënd këto besime duken si mbetje të së kaluarës, frika nga e premtja e 13-të vazhdon të ndikojë edhe sot, pasi shumë njerëz shmangin planifikimin e udhëtimeve, operacioneve apo vendimeve të rëndësishme në këtë datë.