Durrës, 11 qershor 2025 – Një zjarr i fuqishëm ka rënë pasditen e së martës në katin e parë të një pallati në qytetin e Durrësit, duke shkaktuar panik në mesin e banorëve dhe mobilizim të menjëhershëm të forcave të emergjencës.

Flakët janë përhapur me shpejtësi, ndërsa tymi i dendur ka alarmuar banorët dhe lagjen përreth, duke bërë që autoritetet të nisin evakuimin e menjëhershëm të ndërtesës dhe zonave pranë saj.

Në vendngjarje kanë mbërritur tre automjete të zjarrfikëses, të cilat janë duke punuar për izolimin e vatrës së zjarrit, që mbetet ende aktive.

Sipas burimeve zyrtare, situata është konsideruar me rrezik të lartë, për shkak të pranisë së depozitave me hidrokarbure në ambientet e përbashkëta, të cilat shërbejnë për ngrohjen qendrore të pallatit. Ky faktor ka shtuar frikën për shpërthim dhe ka detyruar forcat e rendit të zgjerojnë perimetrin e sigurisë.

Fatmirësisht, deri më tani nuk raportohen të lënduar në radhët e banorëve. Megjithatë, një punonjës i shërbimit zjarrfikës është ndjerë keq për shkak të ekspozimit ndaj tymit dhe është trajtuar nga ekipi mjekësor në vendngjarje.

Policia dhe grupi hetimor ndodhen në vendin e ngjarjes për të hetuar shkakun e zjarrit, i cili deri tani mbetet i paqartë. Ekspertët po verifikojnë nëse ka pasur ndonjë defekt elektrik, rrjedhje gazi apo ndonjë faktor tjetër që mund të ketë shkaktuar flakët.

View this post on Instagram

A post shared by Agjencia Kombëtare e Lajmeve NOA (@noanews)