Frankfurt, 11 qershor 2025 – Ari ka kaluar euron si aseti i dytë më i rëndësishëm në rezervat valutore të bankave qendrore në mbarë botën. Sipas raportit vjetor të Bankës Qendrore Evropiane mbi pozicionin ndërkombëtar të valutës, në fund të vitit 2024 ari përbënte 20% të rezervave globale sipas çmimeve të tregut, duke lënë pas euron me 16%.

Dollari amerikan mbetet valuta dominuese në rezervat botërore, me 46%, ndonëse në rënie të qëndrueshme.

Rritja e ndjeshme e çmimit të arit – i cili është dyfishuar që nga fundi i vitit 2022 – është nxitur nga blerjet agresive të vetë bankave qendrore. Institucionet sovrane kanë blerë më shumë se 1 mijë tonë ar në vit gjatë tre viteve të fundit, ritëm dy herë më i lartë se mesatarja historike.

Zotërimet e arit janë kthyer në nivelet më të larta që nga fundi i viteve ’70, një periudhë e pasigurt monetare që solli rritje të mbështetjes te asetet fizike.

“Kërkesa për ar si rezervë valutore u rrit ndjeshëm pas pushtimit të plotë të Ukrainës nga Rusia në vitin 2022 dhe ka mbetur e qëndrueshme që prej asaj kohe,” thuhet në raportin e BQE-së, i cituar nga Bloomberg.

Rritja e interesit për arin sinjalizon një zhvendosje të qartë në strategjinë e bankave qendrore drejt aseteve të sigurta, përballë tensioneve gjeopolitike dhe pasigurive monetare globale.