Në kuadër të operacionit ndërkombëtar të koduar “The Wanted”, dhe përmes bashkëpunimit ndërmjet Interpol Tiranës dhe Interpol Abu Dhabit, janë finalizuar procedurat për ekstradimin nga Dubai drejt Shqipërisë të dy shtetasve:

Dashnor Dumani, 40 vjeç – I shpallur në kërkim ndërkombëtar nga Gjykata e Posaçme kundër Korrupsionit dhe Krimit të Organizuar (GjKKO), për veprat penale:

“Vrasja në rrethana të tjera cilësuese”

“Vjedhja me armë”

“Mbajtja pa leje dhe prodhimi i armëve, armëve shpërthyese dhe i municionit”, të kryera në kuadër të një organizate kriminale.

Sipas hetimeve, Dumani akuzohet se në vitin 2018 në fshatin Bradashesh ka qenë ekzekutori i vrasjes së shtetasve E. A., A. D. dhe E. D. Ndërkohë, në vitin 2019, ai dyshohet se, në bashkëpunim me shtetasin A. N., ka djegur një nga automjetet e përdorura gjatë një vjedhjeje të armatosur të një shume parash në aeroportin e Rinasit.

Dumani është gjithashtu i dënuar më parë nga Gjykata e Durrësit në vitin 2016 me 4 vjet e 4 muaj burg, për armëmbajtje pa leje. Nga ky dënim, i kanë mbetur për të vuajtur edhe 1 vit e 4 muaj.

Armis Stafa, 36 vjeç – I shpallur në kërkim nga GjKKO për veprën penale “Pastrimi i produkteve të veprës penale ose veprimtarisë kriminale”, kryer në kuadër të organizatës kriminale. Ai akuzohet se ka pastruar paratë e përfituara nga veprimtaria kriminale e shtetasve F. G. alias F. Ç. dhe H. B. alias H. Ç., përmes aktiviteteve të shitblerjes së automjeteve.

Të dy u arrestuan në Dubai pas shkëmbimit të shpejtë të informacioneve dhe bashkëpunimit të ngushtë ndërinstitucional. Aktualisht, ata ndodhen në Shqipëri dhe pritet të përballen me procesin gjyqësor për akuzat përkatëse. /noa.al

View this post on Instagram

A post shared by Agjencia Kombëtare e Lajmeve NOA (@noanews)