Peqin, 11 qershor 2025 – Artan Tafani, i penduar i drejtësisë, ka zbuluar detaje tronditëse mbi vrasjen e 35-vjeçarit Albi Bashaliu, i cili u ekzekutua më 27 dhjetor 2021 në fshatin Gjoçaj të Peqinit. Sipas dëshmisë së tij, vrasja është porositur nga Lorenc Lala, i njohur ndryshe si “Lilo ekonomisti”, për t’u hakmarrë ndaj familjes së viktimës.

“Lili është krahu i djathtë i Saimir Taullaut. Banda e Aldo Bares i kishte vrarë vëllain. Lili mbante lekët e Laertit dhe Saimirit”, deklaroi Tafani përpara prokurorit.

Sipas tij, arsyeja e vrasjes lidhej me një konflikt të mëparshëm, pasi babai i Albi Bashaliut kishte vrarë të atin e Lorenc Lalës në burg.

Për realizimin e atentatit, u përdor një makinë tip Audi e bardhë dhe një tjetër makinë Benz me targa greke, që më pas u braktis pranë një dyqani lulesh. Sipas dëshmisë, automjetet u siguruan nga Ligor Romaçka dhe Lulzimi.

“Ka qenë ora 4 e mëngjesit. E lamë Audin te dyqani i luleve dhe ikëm në Gjoçaj, 10 metra larg lokalit ku ndodhej viktima. Aty e bëmë vrasjen”, tregoi Tafani.

Ai shtoi se armët ishin me silenciator dhe u siguruan nga Bledar Berberi. Njëra prej armëve nuk funksionoi, ndërsa tjetra u përdor për të qëlluar viktimën.

“Kishim dy armë, një TT dhe një me fishekë të vegjël. Unë kisha njërën dhe Lulëzimi tjetrën. Unë e shkrehja armën katër herë: dy herë në gjoks dhe dy herë në shpatull. Në total u qëllua me gjashtë fishekë”, tha Tafani.

Në dëshminë e tij, Tafani shpjegon se informacionet mbi viktimën i morën nga Laerti, i cili komunikoi me Enrikon – personi që u dërgoi një video të makinës së Bashaliut dhe i udhëzoi për vendndodhjen e tij.

Dëshmia e Artan Tafanit është pjesë e hetimeve për zbardhjen e aktivitetit kriminal të një grupi të strukturuar, ku përfshihen emra të njohur si Saimir Taullau, Laert Haxhiu, dhe Lorenc Lala. Hetimet vijojnë.