Policia Kufitare në bashkëpunim me Frontex kanë intensifikuar kontrollet në Pikën e Kalimit Kufitar të Kakavijës, me qëllim parandalimin e krimeve ndërkufitare dhe kapjen e personave të shpallur në kërkim.

Si rezultat i këtyre kontrolleve, në afërsi të një karburanti pranë pikës kufitare, u kap në tentativë për të hyrë ilegalisht në Shqipëri shtetasi A. Sh., 41 vjeç, rezident në Greqi.

Gjatë kontrollit fizik, Policia Kufitare i gjeti këtij shtetasi në çantën e shpinës disa zarfe që përmbanin gjithsej 160 000 euro, të cilat ai po tentonte t’i fuste në territorin shqiptar pa i deklaruar në pikën e kalimit kufitar.

Verifikimet e mëtejshme zbuluan se 41-vjeçari ishte i shpallur në kërkim nga autoritetet shqiptare, pasi Gjykata e Tiranës e kishte dënuar me 1 muaj burg për veprën penale “Vjedhja”.

Në vijim të veprimeve procedurale, nga strukturat e DVP Tiranë u bë ndalimi i tij, ndërsa materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër për veprime të mëtejshme.