Adriatiku mikpret stërvitjen ndërkombëtare DEFENDER 25

Sot, ujërat e detit Adriatik u kthyen në një arenë stërvitjeje të përbashkët ndërkombëtare, ku u zhvilluan operacione detare si pjesë e stërvitjes së madhe ushtarake DEFENDER 25.

Dy anije patrullimi nga Skuadroni i Sigurisë së Ekspeditës Detare të Marinës së Shteteve të Bashkuara shoqëruan anijet e Forcës Detare Shqiptare, në një skenar që përfshiu zbarkime me litar dhe ngjitje në bord të një anijeje shqiptare nga forcat pjesëmarrëse.

DEFENDER 25 është stërvitja më e madhe e përvitshme e Ushtrisë Amerikane në Evropë, duke përfshirë 25,000 trupa nga 29 vende aleate dhe partnere, me qëllim forcimin e gatishmërisë dhe aftësisë për të kryer operacione të përbashkëta në kushte reale.

Këto manovra janë një dëshmi e përkushtimit të NATO-s për mbrojtjen kolektive dhe një garanci që forcat aleate janë të përgatitura për t’u përballur me çdo sfidë të sigurisë në rajon. /noa.al