Tiranë – Zbardhen 4 raste vjedhjesh në banesa dhe lokale, sekuestrohen para dhe sende me vlerë

Katër raste vjedhjesh janë dokumentuar gjatë hetimeve të fundit të Policisë në Tiranë, të ndodhura në zona të ndryshme të kryeqytetit dhe në periferi.

Dy raste kanë ndodhur në lokale, ku autorët kanë hyrë gjatë natës dhe kanë marrë para cash dhe sende me vlerë, përfshirë pajisje elektronike dhe bizhuteri. Vjedhjet janë kryer me thyerje dyersh dhe kamera sigurie kanë ndihmuar në identifikimin e të dyshuarve.

Një tjetër rast është regjistruar në një banesë në zonën e Kombinatit, ku janë marrë një shumë parash dhe stoli floriri. Ngjarja dyshohet të ketë ndodhur në mungesë të banorëve, gjatë orëve të pasdites.

Rasti i katërt është shënuar në fshatin Arbanë, ku në një banesë është marrë një shumë e konsiderueshme parash, ndërsa hyrja është bërë me forcë nga dritarja e pasme. Sipas burimeve, vjedhja ka ndodhur gjatë ditës, kur familjarët ndodheshin jashtë shtëpisë.

Janë arrestuar:

E. D., 20 vjeç, i dyshuar për përfshirje në vjedhje në një banesë dhe dy lokale.

A. K., 33 vjeç, i cili dyshohet se ka vjedhur para nga një banesë në fshatin Arbanë.

Në kërkim është shpallur:

E. G., 21 vjeç, bashkëpunëtor në të paktën tre prej vjedhjeve.

View this post on Instagram

A post shared by Agjencia Kombëtare e Lajmeve NOA (@noanews)

Nga hetimet janë sekuestruar bizhuteri, para të dyshuara si të vjedhura dhe një automjet që dyshohet se është përdorur për lëvizjen e autorëve mes zonave urbane dhe periferike.

Policia po vijon verifikimet për të lidhur ngjarjet me të tjera vjedhje të ndodhura muajt e fundit në Tiranë. /noa.al