Mishi në skarë: i shijshëm, por a është i sigurt për shëndetin? A mund të na sëmurë barbekuja? Ekspertët thyejnë heshtjen

Mishi i pjekur në skarë është një kënaqësi që nuk mungon në tryezat verore, por pyetja që lind shpesh është: a është i mirë apo i keq për shëndetin? Përgjigjet e ekspertëve të ushqyerit dhe mjekëve ndihmojnë për t’i dhënë fund kësaj dileme të zakonshme tek konsumatorët.

Sipas tyre, gatimi në skarë mund të jetë i pranueshëm dhe madje i rekomandueshëm, për sa kohë që bëhet me kujdes dhe me lëndë të përshtatshme. Kjo metodë pjekjeje, në fakt, ndihmon në largimin e lëngjeve të tepërta dhe yndyrës, duke e bërë mishin më të butë dhe më të shijshëm.

Megjithatë, rreziku qëndron te lloji i mishit dhe mënyra e gatimit. Mishi shumë yndyror, kur piqet në skarë, lëshon pika yndyre që bien mbi flakë, krijojnë tym dhe prodhojnë substanca të dëmshme – si hidrokarburet aromatike policiklike (PAH) dhe komponime heterociklike amine (HCA), që lidhen me rritjen e rrezikut për disa lloje kanceresh, veçanërisht ai i zorrës së trashë.

Si të shijoni mishin në skarë pa rrezikuar shëndetin?

Ekspertët sugjerojnë disa masa të thjeshta, por të rëndësishme:

1. Mbani mishin të paktën 5–6 cm larg burimit të nxehtësisë – kjo ndihmon të shmanget kontakti i drejtpërdrejtë me flakën dhe zvogëlon formimin e substancave kancerogjene.

2. Shmangni mishrat me shumë yndyrë – janë më të prirur të krijojnë tym dhe djegie.

3. Zgjidhni feta të holla – sidomos kur bëni mish të marinuar, për t’i dhënë mundësi gatimit më të shpejtë dhe më të butë.

4. Përdorni furrën me mikrovalë për 60–90 sekonda para skarës – kjo ndihmon të veçohen lëngjet dhe të reduktohen ndjeshëm komponimet e dëmshme.

5. Pastroni mirë mishin para pjekjes – sidomos nga lëngjet e tepërta që mund të digjen e të lëshojnë tym.

Në përfundim, mishi i pjekur në skarë nuk është i dëmshëm në vetvete, por rreziku vjen nga mënyra si përgatitet dhe lloji i mishit që zgjidhet. Me pak kujdes dhe zgjedhje të mençura, skara mbetet një mënyrë e shijshme dhe e sigurt për të shijuar ushqimin. /noa.al