Konsumimi ditor i sallamit rrit ndjeshëm rrezikun për shëndetin: ja çfarë thotë studimi i OBSH-së

Një studim i kryer nga Agjencia Ndërkombëtare për Kërkime mbi Kancerin (IARC), që është pjesë e Organizatës Botërore të Shëndetësisë (OBSH) dhe ka selinë në Lyon, ka nxjerrë rezultate shqetësuese lidhur me konsumimin e përditshëm të sallamit dhe mishrave të përpunuar.

Hulumtimi është publikuar në revistën shkencore prestigjioze Lancet Oncology dhe ngre alarmin për të gjithë ata që konsumojnë rregullisht sallam, salçiçe apo produkte të tjera të ngjashme, raporton noa.al.

Ky paralajmërim i drejtohet posaçërisht personave që e kanë zakon të konsumojnë çdo ditë sallam ose mish të përpunuar. Sipas këtij studimi, konsumi i vetëm 50 gramëve në ditë i mishit të përpunuar është i mjaftueshëm për të rritur rrezikun për kancer kolorektal, përkatësisht kancer në zorrën e trashë. Dhe sa më i lartë të jetë konsumimi, aq më i madh bëhet edhe rreziku.

Në të kaluarën, IARC kishte klasifikuar mishrat e përpunuar si ushqime me mundësi kancerogjene për njeriun. Në atë kohë u nënvizua se rreziku nuk qëndron vetëm te vetë produkti, por te sasia që konsumohet çdo ditë. Pikërisht kjo sasi, nëse është e lartë dhe e vazhdueshme, e bën mishin e përpunuar të rrezikshëm për shëndetin.

Arsyeja kryesore për këtë qëndron në mënyrën se si përpunohen këto produkte. Shtimi i kripës, erëzave dhe konservuesve të tjerë gjatë përpunimit industrial është ajo që mund të ndikojë negativisht në trup. Sipas studiuesve, këto përbërës mund të rrisin ndjeshëm gjasat për zhvillimin e disa llojeve të kancerit, veçanërisht të atij që prek sistemin tretës.

Edhe pse lidhja midis mishit të përpunuar dhe kancerit është e qartë, ende nuk ka një përgjigje përfundimtare mbi mekanizmin biologjik që qëndron pas kësaj. Ka disa teori në këtë drejtim: disa shkencëtarë mendojnë se nitratet e përdorura në përpunimin e mishit, kur bien në kontakt me mjedise të acide në trup, formojnë substanca kancerogjene. Të tjerë e shohin fajin te prania e hekurit në mishin e kuq, ndërsa disa teori të tjera i atribuojnë rrezikun ndryshimeve që ndodhin në florën bakteriale të zorrëve.

Megjithatë, është e rëndësishme të theksohet se konsumi i herëpashershëm dhe i moderuar i sallamit ose produkteve të ngjashme cilësore nuk paraqet rreziqe të veçanta për shëndetin. Për më tepër, mishi i kuq, në vetvete, ka një vlerë të lartë ushqyese, pasi përmban hekur, zink dhe vitaminë B12 – elementë të rëndësishëm për funksionimin e duhur të trupit.

Në dritën e këtyre të dhënave shkencore, rekomandimi përfundimtar është i qartë: konsumoni mish të përpunuar me kujdes dhe në mënyrë të kufizuar, duke e parë si një ushqim të rastësishëm dhe jo të përditshëm. Shëndeti afatgjatë varet nga zakonet e përditshme ushqimore. /noa.al