Viterbo, Itali – 4 qershor 2025 – Një zjarr masiv ka përfshirë godinën e Fakultetit të Bujqësisë në Universitetin e Tuscias, në qytetin italian të Viterbos. Flakët nisën nga çatia ku po kryheshin punime ndërtimore dhe u përhapën me shpejtësi, duke përfshirë laboratorët e kimisë dhe gjenetikës.

Të gjithë studentët, mësuesit dhe stafi u evakuuan menjëherë nga ambientet e universitetit. Në vendngjarje ndodhen forcat zjarrfikëse dhe një njësi e specializuar ushtarake, të cilat po punojnë për të vendosur në kontroll flakët.

Zjarri është përkeqësuar nga prania e substancave shumë të ndezshme në laboratorë, përfshirë 500 litra etanol dhe cilindra me protoksid azoti, çka ka bërë që autoritetet të vendosin një perimetër sigurie prej 500 metrash rreth godinës së përfshirë nga flakët.

Një re e dendur tymi është ngritur mbi universitet dhe mund të shihet nga zona të shumta të qytetit. Sipas raportimeve më të fundit, zjarri ka arritur të përfshijë edhe një tjetër ndërtesë në bllokun C të kompleksit universitar Riello. Autoritetet po vlerësojnë situatën për të shmangur rrezikun e shpërthimeve apo përhapjes më të gjerë të zjarrit. Hetimet mbi shkaqet e ngjarjes janë në zhvillim.