Berlin, 4 qershor 2025 – Pas më shumë se një shekulli në qendër të dhomës së ndenjes, televizori mund të jetë drejt fundit të udhëtimit të tij si pajisja kryesore e argëtimit në shtëpi. Ekspertët e teknologjisë paralajmërojnë se dekada e ardhshme mund të shënojë zhdukjen e televizorëve tradicionalë, për t’ia lënë vendin ekraneve virtuale që projektohen përmes kufjeve të realitetit të përzier.

Gazetari gjerman i specializuar në inovacion digjital, Caspar von Allwörden, tha se ekranet klasike tashmë po humbasin terren, ndërsa pajisjet si Apple Vision Pro, të lançuar në fillim të vitit 2024, po ndryshojnë mënyrën se si konsumojmë përmbajtjen mediatike. Këto kufje të avancuara i mundësojnë përdoruesit të shfaqin ekrane virtuale në fushën e tyre të shikimit, pa pasur nevojë për një televizor fizik.

Kjo teknologji, që përzien realitetin e shtuar (AR) dhe realitetin virtual (VR), e bën përvojën e shikimit më fleksibël dhe më personale. Sipas ekspertëve, përdoruesit mund të ndjekin filma, seriale apo lajme nga çdo cep i shtëpisë, pa u kufizuar nga vendosja e një pajisjeje të fiksuar në mur.

Megjithatë, zhvillimi përballet edhe me sfida. Përdorimi i zgjatur i kufjeve mund të shkaktojë lodhje ose parehati fizike, ndërsa përvoja individuale që ofrojnë këto pajisje mund të izolojë përdoruesit dhe të zbehë ndjeshëm përjetimin kolektiv që ofronte televizioni klasik.

Analistët e tregut mendojnë se, ndonëse ekranet virtuale kanë potencial të lartë për të revolucionarizuar industrinë e argëtimit, tranzicioni drejt kësaj teknologjie do të varet nga përballueshmëria, përdorshmëria masive dhe adaptimi social i përvojave të reja vizuale.

Nëse trendet aktuale vazhdojnë me këtë ritëm, pritet që brenda 10 viteve, televizori, siç e njohim sot, të kthehet në një relike të së kaluarës teknologjike.