Minneapolis, 2 qershor 2025 – Dy pëllumba që depërtuan në kabinën e një avioni të Delta Airlines shkaktuan kaos dhe vonesë në nisjen e fluturimit 2348 nga aeroporti Minneapolis-St. Paul drejt Wisconsin-it, të shtunën në mbrëmje.

Ngjarja e pazakontë ndodhi pak para nisjes, kur një nga pasagjerët, Tom Ko, filmoi momentin kur një pëllumb fluturonte nëpër kabinën e mbushur me pasagjerë. Në video shihet një burrë që përpiqet të ndalojë zogun me xhaketën e tij, ndërsa të tjerët përkulen për t’u mbrojtur dhe dëgjohen ulërima.

Më herët, një tjetër pëllumb ishte nxjerrë jashtë nga stafi i aeroportit me ndihmën e punonjësve të bagazheve. Pas kapjes së zogut të dytë, piloti njoftoi kullën e kontrollit për kthim në portën e imbarkimit.

Zëdhënësi i Delta Airlines konfirmoi se fluturimi, në të cilin ndodheshin 119 pasagjerë dhe 5 anëtarë të ekuipazhit, u vonua për 56 minuta. “Kompania falënderon stafin dhe klientët për reagimin e kujdesshëm dhe kërkon ndjesë për shqetësimin e krijuar,” thuhej në deklaratë.

Ngjarja shkaktoi jo vetëm vonesë, por edhe një moment të pazakontë që u bë viral në rrjete sociale. Autoritetet e aeroportit po hetojnë se si zogjtë mundën të hyjnë në avion.