Marc-André ter Stegen ka qenë i qartë: e ardhmja e tij është te Barcelona. Gjatë një konference për shtyp nga grumbullimi i përfaqësueses gjermane, ku po përgatitet për gjysmëfinalen e “Nations League” kundër Portugalisë, portieri blaugrana ka hedhur poshtë çdo dyshim rreth largimit të mundshëm nga klubi katalanas: “Askush në klub nuk më ka thënë se duan të më shesin. Nuk jam i shqetësuar, e ardhmja ime është te Barça”.

Portieri 32-vjeçar, i cili ka kontratë me Barcelonën deri në vitin 2028, theksoi rëndësinë e klubit ku bën pjesë: “Barcelona është një nga klubet më të mëdha në botë, është normale që kërkon gjithmonë të përmirësohet. Personalisht jam gati të luftoj për vendin tim në formacion”.

Ndërkohë, Ter Stegen shprehu mirënjohje për trajnerin e Gjermanisë, Julian Nagelsmann, pas tërheqjes së Manuel Neuer: “Të jesh titullar në kombëtare është një nder i madh. Do të jap gjithçka për të qenë gati për Kupën e Botës 2026”.

Të mërkurën, ai do të përballet me Cristiano Ronaldon në gjysmëfinale: “Është një kampion i madh, por shpresoj që statistikat e tij të mos përmirësohen kundër nesh”.