Tiranë, 1 qershor 2025 – Një ngjarje e rëndë është shënuar pasditen e sotme në zonën e Ali Demit në Tiranë, ku një 15-vjeçar ka mbetur i plagosur me armë zjarri pas një konflikti në një piceri.

Sipas informacioneve zyrtare nga Policia e Tiranës, ngjarja ka ndodhur rreth orës 17:10, kur i mituri është paraqitur në spital me plagë në zonën mes qafës dhe shpatullës. Ai është jashtë rrezikut për jetën dhe ndodhet nën kujdesin e mjekëve në një nga spitalet e kryeqytetit.

Nga hetimet paraprake dyshohet se konflikti ka nisur për motive të dobëta mes 15-vjeçarit dhe një motoristi, i cili më pas ka nxjerrë armën dhe ka qëlluar në drejtim të tij.

Policia dhe grupi hetimor kanë mbërritur menjëherë në vendngjarje, duke bërë të mundur identifikimin e autorit të dyshuar, por pa e bërë ende publik identitetin e tij, për shkak se hetimet janë në vijim.

Ende nuk janë siguruar pamje filmike nga kamerat e sigurisë që mund të ndihmojnë në zbardhjen e plotë të dinamikës së ngjarjes. Hetimet për dokumentimin e plotë të rrethanave vazhdojnë.