Në prag të finales së Ligës së Kampionëve, një nga protagonistët më të shumëpritur, Ousmane Dembélé, zgjodhi të linte mënjanë çdo diskutim personal dhe të përqendrohet plotësisht në objektivin kolektiv: fitoren e PSG-së. Në një intervistë për “TNT Sports”, anësori francez deklaroi se nuk dëshiron të mendojë për “Topin e Artë”, pavarësisht zërave dhe këshillave nga njerëzit pranë tij.

“Të gjithë më flasin për këtë, por sinqerisht nuk mendoj për të, – tha Dembélé. – Para së gjithash duhet të fitojmë Champions-in. Kur luan për PSG-në, trofetë e skuadrës kanë më shumë rëndësi sesa ato individualë. Të marrim këtë trofe në shtëpi është e vetmja gjë që ka rëndësi”.

Numri 10 i PSG-së, autor i një sezoni në rritje dhe vendimtar në rrugëtimin europian të klubit, nuk e nënvlerëson aspak kundërshtarin: “Do të jetë e vështirë kundër Interit, i kam ndjekur gjatë gjithë sezonit, sepse atje luan Marcus Thuram. Janë një grup solid, me lojtarë që luajnë bashkë prej 4-5 vitesh. Do të jetë një ndeshje e fortë”.

Finalja e sotme nuk do të jetë vetëm një përballje për të ngritur trofeun më prestigjioz të Europës për klubet, por edhe moment vendimtar në garën për “Topin e Artë” të ardhshëm. Sidoqoftë, Dembélé ka zgjedhur rrugën e përulësisë dhe përqendrimit: së pari Champions-i, pastaj çmimet personale. Një mesazh i qartë, që tregon maturinë dhe ambicien kolektive pariziene.