Tiranë – Finalizohet operacioni “Puzzle”, goditet trafiku i armëve nga Kosova në Shqipëri, 12 të identifikuar, 10 të arrestuar

Tiranë – Policia e Tiranës, në bashkëpunim me Prokurorinë dhe autoritetet kosovare, ka finalizuar me sukses operacionin policor të koduar “Puzzle”, që kishte në fokus goditjen dhe parandalimin e trafikimit të armëve të zjarrit nga Kosova në drejtim të Shqipërisë.

Operacioni, i zhvilluar nga Seksioni për Hetimin e Trafiqeve të Paligjshme dhe Forca Operacionale e DVP Tiranë, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, u përmbyll pas një hetimi 5-mujor me metoda proaktive.

Gjatë operacionit u sekuestruan 14 armë zjarri, përkatësisht 12 pistoleta (njëra prej tyre me silenciator) dhe 2 automatikë, si dhe municion luftarak, krehra, 2077 fara cannabisi, 3 automjete dhe 8 telefona celularë.

Në total, janë identifikuar 12 shtetas të përfshirë në këtë rrjet të trafikut të armëve. Deri më tani, 10 prej tyre janë vënë në pranga:

Të arrestuarit në vijim të operacionit janë:

Emirel Tusha, 32 vjeç

Leandro Haxhiaj, 21 vjeç

Fabricio Berberi, 26 vjeç

Rikardo Hajdaraj, 21 vjeç

Visar Murati, 23 vjeç

Kevin Farruku, 18 vjeç

Geraldo Muraj, 22 vjeç

Adriano Shehu, 23 vjeç

Ndërsa më datë 1 prill 2025, janë ndaluar:

Altin Pajaziti

Kadri Prushi

Të dy janë kapur në flagrancë me dy armë zjarri të dyshuara si të trafikuara nga Kosova për shitje në Tiranë.

Gjithashtu, janë shpallur në kërkim:

Rigers Kamberi, 41 vjeç

Arjan Nela, 24 vjeç

Nga hetimet dyshohet se këta shtetas siguronin armë zjarri në Kosovë dhe në qytete të tjera të Shqipërisë dhe i sillnin në Tiranë për t’i tregtuar. Gjatë kontrolleve në banesën e Kevin Farrukut, u gjetën dhe sekuestruan edhe 2077 fara cannabisi.

Policia po vijon punën për kapjen e personave të shpallur në kërkim dhe për dokumentimin e plotë të kësaj veprimtarie kriminale. DVP Tiranë nën drejtimin e Prokurorisë ka intensifikuar bashkëpunimin me autoritetet policore të Kosovës për të identifikuar dhe arrestuar çdo person të përfshirë në këtë rrjet trafikimi.

Materialet procedurale i janë referuar Prokurorisë për veprime të mëtejshme ligjore. /noa.al