Ka përfunduar aventura e Cristiano Giuntolit si përgjegjës i merkatos së Juventusit. Pas disa javësh reflektimi mbi të ardhmen e tij, klubi bardhezi ka vendosur më në fund të ndajë rrugët me ish-drejtuesin e Napolit, pas dy vitesh bashkëpunim. Në orët në vijim, Juventusi do të zyrtarizojë largimin e Giuntolit.

Klubi është duke vlerësuar emra të rinj për të plotësuar organigramën drejtuese, të gjitha pozicionet pritet të përcaktohen së shpejti. Ish-drejtuesi i Carpit dhe Napolit, së bashku me pjesën tjetër të skuadrës, arriti kualifikimin në Ligën e Kampionëve falë vendit të katërt të siguruar në ditën e fundit të kampionatit.

Përveç kësaj, ai ka përmirësuar gjendjen financiare të klubit, i cili pas disa viteve me bilanc negativ, pritet ta mbyllë sezonin me bilanc të barabartë. Megjithatë, këto arritje nuk kanë mjaftuar që ai ta mbajë postin si drejtues i merkatos te Juventusi.

Për Giuntolin dhe punën e tij në këto dy vite në Torino, foli edhe ish-trajneri i tij te Carpi, Fabrizio Castori: "Preferoj të mos flas për Juventusin. Kam shumë respekt për Giuntolin, është shumë i përgatitur dhe i zoti. Jam i sigurt se do të dijë si të dalë nga kjo situatë".