Ish-trajneri i Interit dhe Romës, José Mourinho, aktualisht në krye të Fenerbahçes, ka komentuar situatën e Ruben Amorim te Manchester United, në një intervistë për “Sky Sport”: “Po e mbështesin Ruben, po i japin kohën dhe kushtet për të ecur përpara.

Lexova disa deklarata të tij ku thoshte se ishte i lumtur që kaloi këto 6 muaj te Manchester United. Kur shkova te Porto, më ndodhi e njëjta gjë, pata 6 muaj të vështirë. Kishim vështirësi për t’u kualifikuar në ‘Europa League’, më pas ndodhi ajo që ndodhi”.

Nuk është hera e parë që të dy bashkëkombësit shkëmbejnë respekt dhe vlerësim të ndërsjellë. Në nëntor, Amorim kishte zbuluar, në momentin e mbërritjes së tij te “Djajtë e Kuq”: “Mourinho më dërgoi një mesazh dhe më tha se ky është klub i dashur, klub i madh, me njerëz të mrekullueshëm. Dhe kishte të drejtë, kështu është ende”.

Në disa raste, Amorim ka pranuar se është inspiruar nga Mourinho, si kur deklaroi: “Jam tipi i trajnerit që pëlqen të krijojë lidhje me lojtarët. Mendoj se kështu e menaxhoj më mirë grupin, ndryshe nga një trajner i ftohtë. Edhe në këtë aspekt, Mourinho më ka ndikuar, sepse ai e solli këtë qasje në futboll. Besoj se të gjithë trajnerët kanë mësuar shumë prej tij”.