Pas humbjes së rëndë që pësoi Fenerbahçe në fushën e Hataysporit (që tashmë ka rënë nga kategoria), José Mourinho theksoi vështirësinë për t’i motivuar lojtarët e tij në ndeshjet e fundit të një sezoni që është përcaktuar prej javësh:

“Vetëm ata që nuk kuptojnë futbollin nuk e dinë çfarë do të thotë të jesh në fund të sezonit. Këto periudha janë të dhimbshme për skuadrat që nuk kanë më objektiva. Edhe sikur të kishim fituar 12 pikë në 4 ndeshjet e fundit, renditja nuk do të ndryshonte”.

Mourinho pranoi se “kishte pësuar një humbje të rëndë”, por theksoi: “Njerëzit mendojnë se ne nuk vuajmë, mendojnë se kthehemi në shtëpi pa u lënduar. Nuk është e vërtetë. Lojtarët janë njerëz; ndonjëherë iu mungon besimi dhe motivimi. Kjo ndodh kur humbasim matematikisht kampionatin”.

Në ditën kur mbusheshin 21 vite nga fitorja e Ligës së Kampionëve me Porton, Mourinho pësoi një nga humbjet më të këqija me Fenerbahçen, por u mbrojt duke sulmuar: “Unë kam luajtur më shumë finale europiane në 7 vitet e fundit se gjithë futbolli turk në historinë e tij.

Tek Fenerbahçe kemi luftuar për t’u kualifikuar në Ligën e Kampionëve të fundit, por vera ka qenë e vështirë për ne dhe jemi eliminuar në minutën e fundit me penallti. Do të luftojmë për t’u kualifikuar në fazën finale të Ligës së Kampionëve të ardhshme. Duhet të luajmë një raund paraprak dhe pastaj ‘play off’. Duhet të përgatitemi sa më mirë për këto ndeshje”.

E ardhmja: “Nuk ka dalë asgjë nga goja ime. Nuk kam asnjë kontakt me shtypin, nuk i zbuloj kurrë takimet që kam me presidentin dhe bordin drejtues. Disa javë më parë presidenti më kërkoi të qëndroja, më beson. Ky është një lajm i njohur për publikun. Nëse situata ka ndryshuar, nuk jam informuar”.