Duhet të harrohet sa më shpejt ky sezon negativ. Milani do ta mbyllë sot kampionatin e tij. Në "San Siro" do të vijë Monza, që mbyll renditjen dhe ka rënë nga kategoria prej disa javësh, për “vallëzimin” e fundit në Serie A.

Kuqezinjtë, megjithëse kanë fituar Superkupën e Italisë, vijnë pas një sezoni zhgënjyes, pa kualifikim në kupat europiane dhe me një finale të humbur të Kupës së Italisë kundër Bologna. Për sezonin e ardhshëm do të nevojitet një revolucion i vogël, me disa afrime të mundshme.

Do të ketë shumë punë për drejtorin e ri sportiv. Java e ardhshme pritet të sjellë zyrtarizimin e Igli Tares, i cili do të ketë detyrën të ndërtojë një skuadër konkurruese, që të rikthehet në luftë për objektiva të mëdhenj. Siç raporton edicioni i sotëm i “Gazzetta dello Sport”, ish-drejtori i Lazios do të jetë menjëherë operativ, me synimin e klubit nga rruga "Aldo Rossi" për të përshpejtuar proceset.

Prioriteti i parë për Taren do të jetë zgjidhja e çështjes së trajnerit, ndërsa më pas do të duhet ndjekur situata e Tijjani Reijnders, i cili ka rinovuar kontratën deri në vitin 2030, por është gjithashtu në shënjestër të Manchester City, Real Madridit dhe Barcelonës. Në fund, do të vlerësohen edhe situatat e lojtarëve që do të kthehen në skuadër: nga Okafor te Kalulu, duke përfshirë Bennacer, Adli dhe Saelemaekers.