TIRANA- Një 63-vjeçar italian ka ndërruar jetë sot teksa dyshohet se ndodhi pak ditë pas një ndërhyrjeje kirurgjikale që ai kishte bërë më datë 20 maj në një klinikë dentare në rrugën e Kosovarëve në Tiranë.

Në njoftimin e policisë thuhet se italiani, i identifikuar me inicialet D.S., është paraqitur për mjekim në spital më 22 maj – 2 ditë pas ndërhyrjes kirurgjikale, pasi nuk ishte ndjerë mirë pas ndërhyrjes kirurgjikale në klinikën dentare.

Ndërkohë, specialistët për Hetimin e Krimit në Komisariatin e Policisë Nr. 2 kanë kryer veprimet e para hetimore, ku i kanë marrë deklarim administratorit dhe dentistit të klinikës.

Njoftimi:

Më datë 22.05.2025, ka shkuar për mjekim në spital shtetasi italian D. S., 63 vjeç, me banim të përkohshëm në Tiranë, pasi dyshohet se pas një ndërhyrje kirurgjikale më datë 20.05.2025, në një klinikë dentare në Rrugën e Kosovarëve nuk është ndier mirë. 63-vjeçari, pavarësisht ndihmës mjekësore të marrë, ka ndërruar jetë mëngjesin e sotëm.

Specialistët për Hetimin e Krimit në Komisariatin e Policisë Nr. 2 kanë kryer veprimet e para hetimore, ku i kanë marrë deklarim administratorit dhe dentistit të klinikës. Materialet u referuan në Prokurori, për vlerësim të mëtejshëm të rastit.