Prishtinë, 23 maj 2025 – Zëvendësministri i Kosovës, Arbër Vokrri, u shkarkua të premten pas akuzave të rënda mbi deklaratat e tij publike dhe qëndrimet politike që kanë shkaktuar reagime të forta brenda dhe jashtë vendit.

Shkarkimi i Vokrrit erdhi menjëherë pasi ai deklaroi se "ndërkombëtarët kishin nxitur trazirat në veri", por kjo nuk ishte hera e parë që ai bëhej pjesë e polemikave të ashpra. Më herët, ai kishte komentuar edhe prejardhjen e heroit kombëtar shqiptar Gjergj Kastrioti – Skënderbeu, duke e quajtur atë dhe familjen e tij “pravosllavë” dhe duke pretenduar se janë varrosur në manastirin më të shenjtë serb.

“Ky sultan gjysmëshqiptar e mundi perandorin gjysmëserb të Bizantit… Kastriotët pravosllavë u bënë murgj në manastirin më të shenjtë serb,” kishte shkruar Vokrri në një koment në Facebook.

Përveç qëndrimeve të debatueshme historike, Vokrri u përfshi edhe në diskutime fetare, ku shfaqi bindje të forta pro-islamike. Gjatë një iftari të organizuar nga imami Shefqet Krasniqi, ai u shpreh se shqiptarët kanë një mision për përhapjen e Islamit në Perëndim, duke e cilësuar këtë si pjesë të identitetit kulturor të kombit shqiptar.

“Për më shumë se gjashtë shekuj jemi në ndikim të fuqishëm të qytetërimit islam. Ne jemi populli i vetëm me rëndësi politike që mund të krenohet si produkt i përhapjes së Islamit drejt Perëndimit,” tha Vokrri gjatë fjalës së tij.

Deklaratat e tij kanë shkaktuar reagime të shumta dhe janë cilësuar si përçarëse, duke çuar përfundimisht në largimin e tij nga posti qeveritar.