Në një moment që sfidon çdo rregull të diplomacisë sportive, presidenti i Serbisë, Aleksandar Vuçiç, ka lëshuar një thirrje të fortë dhe simbolike në drejtim të kombëtares serbe të futbollit, vetëm pak javë para përballjes së zjarrtë kundër Shqipërisë, e vlefshme për kualifikueset e Botërorit 2026. Kujtojmë se kuqezinjtë tanë dhe kombëtarja serbe ranë në të njëjtin grup eliminator për Botërorin e vitit të ardhshëm, teksa sfida e parë do të luhet më 7 qershor në “Arena Kombëtare”.

“Në qershor do të luani atje kundër Shqipërisë…, shkoni dhe mposhtini”, – urdhëroi presidenti serb, duke iu drejtuar trajnerit të kombëtares së vet, i pranishëm në mitingun e zhvilluar në Nish.

Kjo deklaratë nxitëse u bë gjatë një tubimi elektoral në Nish, përballë një turme entuziaste dhe nën reflektorët e nacionalizmit të pastër. I pranishëm në shesh ishte edhe trajneri i kombëtares serbe, Dragan Stojkoviç, të cilin Vuçiç e lavdëroi për “besnikërinë” e tij, ndërsa i bëri thirrje publike ta udhëheqë Serbinë drejt një fitoreje në tokën shqiptare, jo thjesht sportive, por me qasje politike dhe nacionaliste.

Në sfondin e kësaj deklarate të zhurmshme, që bie si një “grusht” mbi tryezën e përpjekjeve për normalizim rajonal, qëndron një e vërtetë e pakëndshme: ndeshjet Shqipëri–Serbi nuk janë kurrë thjesht 90-minutësha futbolli. Janë përballje me peshë emocionale, historike dhe simbolike, që e ngrenë tensionin përtej stadiumit ku luhet ndeshja.

Ironia e fortë nuk mund t’i shpëtojë vëmendjes, teksa vetëm pak ditë më parë, Vuçiç qëndronte ulur në Tiranë, i mikpritur nga kryeministri Edi Rama në samitin e liderëve europianë. Por ndërsa në atë tryezë predikohej bashkëpunimi, në Nish u bë thirrje për dominim sportiv, nacionalist, politik e gjithfarësh nga Vuçiç.

Më 7 qershor, Shqipëria dhe Serbia do të zbresin në fushën e “Arena Kombëtare” për një duel që ngërthen shumë më tepër sesa tri pikë. Është krenaria kombëtare, është historia, është sfida përballë njëri-tjetrit. Dhe kur politika përzihet me futbollin, loja e humbet domethënien e saj. “Zjarri” është ndezur, tensioni sa vjen e rritet.

Sigurisht, ajo që ndodhi në Beograd më 4 tetor 2014, në ndeshjen e ndërprerë në fund të pjesës së parë për shkak të fluturimit të dronit mbi stadium dhe dhunës që pasoi, beteja ligjore pastaj në CAS, ku kuqezinjtë tanë fituan 3 pikë të çmuara, vendimtare për kualifikim në finalet e “Euro 2016”, mbetet si “gjembi në mish” për serbët, të cilët do të kërkojnë shpagim në këto kualifikuese të Botërorit 2026, teksa shorti na ka vendosur në një grup.

Takimi i 7 qershorit mes Shqipërisë dhe Serbisë pritet të shoqërohet jo vetëm me intensitet sportiv, por edhe me tensione jashtë fushës. Në një duel ku topi është vetëm një pjesë e betejës, emocionet, historia dhe krenaria kombëtare janë po aq të rëndësishme sa rezultati në tabelë.