Durrës, 20 maj 2025 – Vijojnë hetimet intensive për zbardhjen e ngjarjes së rëndë që ndodhi në orët e para të mëngjesit të sotëm, ku dyshohet se mbeti i vrarë me armë zjarri shtetasi Ermir Dedja, 29 vjeç, në lagjen nr. 18 të qytetit të Durrësit.

Në kuadër të kontrolleve të kryera nga grupi i posaçëm hetimor, nën drejtimin e Prokurorisë, shërbimet e Policisë së Durrësit, në bashkëpunim me ato të Policisë së Tiranës, kanë gjetur një automjet të djegur në fshatin Gërdec. Brenda këtij automjeti u gjet edhe një armë zjarri, të cilat dyshohet se janë përdorur nga autorët e krimit.

Grupi hetimor po vijon me intensitet punën për zbardhjen e plotë të rrethanave të kësaj ngjarjeje dhe për sigurimin e çdo prove që do të ndihmojë në identifikimin dhe kapjen e autorëve të dyshuar.