Fier, 19 maj 2025 – Një ngjarje e rëndë ka ndodhur rreth mesnatës në fshatin Mbrostar Ura, ku një 23-vjeçar ka plagosur babanë e tij pas një konflikti brenda familjes. Autori i dyshuar, shtetasi me inicialet J. Z., është vënë menjëherë në pranga nga shërbimet e Komisariatit të Policisë Fier.

Sipas burimeve zyrtare, autori ka përdorur një armë të modifikuar, e përshtatur si armë sportive, me të cilën ka qëlluar babanë e tij, shtetasin N. Z., 58 vjeç, duke e plagosur në këmbë.

Fatmirësisht, 58-vjeçari ndodhet nën kujdesin e mjekëve dhe është jashtë rrezikut për jetën.

Policia ka sekuestruar armën e përdorur në vendin e ngjarjes, ndërkohë që ndaj 23-vjeçarit kanë nisur procedurat penale. Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, për hetime të mëtejshme.

Njoftimi i Policisë;

Plagosi babanë e tij, me një armë të modifikuar, pas një konflikti në familje, kapet 23-vjeçari.

Sekuestrohet arma e modifikuar si armë sportive.

Shërbimet e Komisariatit të Policisë Fier, rreth mesnatës, sapo janë njoftuar se një shtetas kishte plagosur babanë e tij, në banesën e tyre, në fshatin Mbrostar Ura, kanë organizuar punën dhe kanë shkuar në vendngjarje, me qëllim kapjen e autorit.

Si rezultat i veprimeve të shpejta policore u kap dhe u vu në pranga, shtetasi J. Z., 23 vjeç.

Ai dyshohet se pas një konflikti me babanë e tij, shtetasin N. Z., 58 vjeç, e ka plagosur atë, në këmbë, me një armë të modifikuar si armë sportive.

58-vjeçari është aktualisht në kujdesin e mjekëve dhe jashtë rrezikut për jetën.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.