Legjenda e pankinës kuqezi, por jo vetëm, Arrigo Sacchi, nuk i ka kursyer kritikat për Milanin pas humbjes zhgënjyese në finalen e Kupës së Italisë ndaj Bologna. Në një intervistë për “Gazzetta dello Sport”, ish-trajneri që ndryshoi historinë e “Djallit” shprehu hapur trishtimin dhe zhgënjimin për drejtimin që ka marrë klubi aktual.

“Ta shoh Milanin në këtë gjendje më jep një trishtim të madh, sepse unë jam i lidhur me atë ambient, me tifozët, me ato ngjyra. Duke parë finalen e Kupës së Italisë, të humbur me meritë ndaj Bologna, mora konfirmimin e asaj që mendoja që në fillim të këtij sezoni: Milani nuk është një skuadër”.

Klubi nuk ka ide të qarta

Sacchi i është kthyer periudhës së artë me presidentin Silvio Berlusconi, duke e krahasuar qartë vizionin e së kaluarës me paqartësinë e së tashmes: “Presidenti Berlusconi, kur më mori mua, më tha që synimi i tij ishte të fitonte dhe të bindte me lojë. Donte që Milani të bënte spektakël, t’i argëtonte njerëzit. Kishte një ide dhe dinte si t’ua përcillte bashkëpunëtorëve të tij. A ju duket se Milani i sotëm, si klub, ka ndonjë ide? Mua më duket se jo”.

Kaos në pankinë dhe lëvizje të gabuara

Sa i përket menaxhimit të trajnerëve, Sacchi vëren mungesë vizioni që, sipas tij, ka dëmtuar rëndë ekipin: “Zgjedhja e trajnerit në fillim të sezonit është thelbësore. Milani, verën e kaluar, fillimisht mendoi të merrte Lopeteguin, por më pas, pasi tifozët u zemëruan, kaloi te portugezi Fonseca. Ata që morën këtë vendim bënë një gabim të madh. Në mes të sezonit e ndryshuan mendimin dhe ia besuan pankinën Sergio Conceiçao, i cili sipas meje është më pak fajtor se të gjithë, sepse u gjend në kaos total. Dhe në fund, do ta shihni që pikërisht ai do të paguajë, sepse ky është një ligj i vjetër dhe absurd i futbollit: largo trajnerin dhe bëj sikur gjithçka rregullohet”.

Kritika të drejtpërdrejta për merkaton

Nuk mungojnë kritikat as për politikën e merkatos dhe ndërtimin e skuadrës. Sacchi nënvizon mungesën e një filozofie të qartë dhe përzgjedhjet pa kriter: “Milani është një përzierje lojtarësh të marrë pa kriter. Nuk po diskutoj cilësitë e tyre teknike individuale, edhe pse mund ta bëja. Problemi është se nuk janë elementë që formojnë një skuadër. Bëhen blerje nga jashtë dhe sinqerisht nuk e kuptoj pse; vijnë lojtarë me përvoja dhe kultura krejtësisht të ndryshme. Duhet përpjekje për t’i përshtatur, por në këtë mënyrë si mund të krijosh një stil loje”.

Një mesazh i fortë dhe i drejtpërdrejtë nga njeriu që i dha Milanit identitet e lavdi historike. Kritikat e Sacchi tingëllojnë si alarm për një klub që duket se ka humbur rrugën mes nostalgjisë për të shkuarën dhe konfuzionit në të tashmen.