Federata Shqiptare e Futbollit ka publikuar formacionin më të mirë të sezonit 2024-2025 në Kategorinë Superiore. Përzgjedhje e realizuar nga trajnerët e ekipeve kombëtare të moshave, të cilët kanë vlerësuar më të mirët në çdo pozicion, bazuar në paraqitjet e tyre gjatë gjithë sezonit.

Në këtë formacion dominon Egnatia, kampionia e këtij sezoni, me pesë përfaqësues në formacionin ideal dhe trajnerin e saj, Edlir Tetova, i cili është shpallur trajneri më i mirë i sezonit për drejtimin brilant të rrogozhinasve drejt suksesit të madh (dy titujve kampionë radhazi).

Formacioni më i mirë i Kategorisë Superiore 2024-2025:

Portier:

Dajsinani (Egnatia) – Një sezon spektakolar mes shtyllave, me pritje decizive dhe siguri në ndeshjet kyçe.

Mbrojtja (nga e majta në të djathtë):

Musta (AF Elbasani) – Veteran, me eksperiencë dhe kontribut të vazhdueshëm në krahun e majtë.

Aliji (Dinamo City) – Një prej lojtarëve më të qëndrueshëm të sezonit, me lexime të sakta të lojës.

Preka (Partizani) – Siguri dhe karakter në prapavijën e të kuqve.

Kruja (Teuta) – I fuqishëm në duele dhe gjithnjë aktiv në ndërtimin e aksioneve nga mbrapa.

Mesfusha:

Ujka (Egnatia) – Lider i padiskutueshëm në mesin e fushës, me ritëm, ide dhe balancë.

Lushkja (Egnatia) – Një tjetër element kyç i skuadrës kampione, kontribues me gola dhe asiste.

Mala (Vllaznia) – Motori i shkodranëve, gjithmonë në lëvizje dhe vendimtar në momentet e vështira.

Sulmi:

Dodaj (Vllaznia) – I rrezikshëm dhe teknik, Dodaj ishte një prej pikave të forta të ofensivës së kuqebluve.

Balaj (Vllaznia) – Golashënues konstant dhe lider në sulm për Vllazninë.

Zabërgja (Dinamo City) – Një sezon në rritje për sulmuesin dinamovit, me gola të rëndësishëm dhe lëvizshmëri të madhe në sulm.

Trajneri i sezonit: Edlir Tetova (Egnatia)

Nën drejtimin e Tetovës, Egnatia jo vetëm që tregoi vazhdimësi, por edhe stil loje të organizuar, efikas dhe kompetitiv, duke u kurorëzuar me titullin e dytë radhazi kampion, pasi kishte fituar gjithçka (titullin, Kupën e Shqipërisë dhe Superkupën e Shqipërisë) sezonin e kaluar.

Ky formacion reflekton jo vetëm statistikat dhe suksesin e arritur nga këto lojtarë, por mbi të gjitha cilësinë, ndikimin dhe kontributin e tyre në ecurinë e skuadrave respektive.