Egnatia e fitoi për të dytin vit radhazi titullin kampion në Shqipëri. Në finale, skuadra rrogozhinase mposhti thellë 4-0 Vllazninë, e cila ndiqej nga një numër rekord tifozësh kuqeblu në “Arena Kombëtare”, por u larguan që aty tepër të zhgënjyer. Shkodranët nuk mundën ta kthenin titullin në “palmaresin” e tyre as pas 24 vitesh “agjërim”.

Duke komentuar atë që ndodhi mbrëmë, presidenti i FSHF-së, Armand Duka, ka nënvizuar mes të tjerash: “Urime ekipit të Egnatias për fitimin e titullit kampion në Kategorinë Superiore!

Një sezon fantastik, me beteja të shumta deri në momentet e fundit në kampionatin e rregullt dhe i mbyllur me një finale emocionuese në ‘Arena Kombëtare’.

Përgëzime fituesit dhe të gjitha ekipeve garuese, duke nisur nga Vllaznia finaliste e deri tek ekipi i fundit që garoi në Superiore për të arritur objektivat e veta.

Urime lojtarëve të Egnatias, stafit teknik, drejtuesve dhe tifozëve që ndoqën dhe mbështetën skuadrën e tyre në këtë rrugëtim të përmbyllur me trofe.

Dëshiroj shumë një përfaqësim sa më dinjitoz të ekipeve tona në Kupat e Europës në vazhdim, çka do të ishte edhe shpërblimi më i madh për punën e bërë gjatë gjithë sezonit futbollistik”.