Kreu i Partisë Demokratike, Sali Berisha, ka dalë sot në një deklaratë për mediat ku tha se procesi zgjedhor i 11 majit është i përshkuar nga shkelje të rënda që cënojnë standardet e zgjedhjeve të lira dhe të ndershme.

Berisha tha se konkluzionet e PD-së për procesin nuk janë politike, por të bazuara dhe tashmë të certifikuara edhe nga forume ndërkombëtare.

“PD u ka thënë shqiptarëve dhe botës se çfarë është procesi elektoral në Shqipëri. Ato konkluzione nuk janë politike, por të bazuara dhe të certifikuara. Duhet të përfundojë numërimi i çdo vote dhe më pas PD do bëjë vlerësimin e saj të plotë,” – u shpreh ai.

Sipas tij, procesi është cenuar rëndë nga:

mbjellja masive e kanabisit për qëllime elektorale,

punësimi në masë i mijëra qytetarëve për votë,

ngritja e zyrave të paligjshme pranë qendrave të votimit,

falja e 150 milionë eurove gjoba për mbi 170 mijë qytetarë vetëm dy ditë para zgjedhjeve.

“Ka kritere për zgjedhjet. Ato janë shkelur në mënyrën më të pamëshirë,” – deklaroi Berisha, duke shtuar se rastet e ndërhyrjeve kriminale në proces janë publike dhe të dokumentuara.

Pavarësisht kritikave, ai i bëri thirrje strukturave të PD të jenë të pranishme dhe të përgjegjshme në numërim:

“Jam këtu për t’u bërë thirrje qytetarëve dhe strukturave të PD: të numërojmë çdo votë. Të tregojmë përgjegjësi para atyre që kanë votuar,” – tha ai, duke shtuar se askush nuk mund të injorojë këto fakte të rënda që kanë shoqëruar procesin zgjedhor. /noa.al