Fier: Dokumentohet një rast i blerjes së votave, arrestohet 63-vjeçari – Procedim edhe për kanosje në Lushnjë

Drejtoria Vendore e Policisë Fier ka bërë të ditur se si rezultat i një hetimi njëmujor, të zhvilluar në drejtimin e Prokurorisë së Posaçme Kundër Korrupsionit dhe Krimit të Organizuar (SPAK), është dokumentuar një rast i korrupsionit zgjedhor.

Në përfundim të hetimeve, specialistët për Hetimin e Krimeve Ekonomiko-Financiare ekzekutuan urdhrin e ndalimit për shtetasin Pandeli Bozha 63 vjeç, banues në fshatin Portëz. Bozha është babai i Limonera Bozha, kandidate për deputete e PSD, raporton noa.al.

Ai dyshohet se gjatë një periudhe njëmujore ka shpërndarë shuma parash ndaj disa qytetarëve, me qëllim blerjen e votës në favor të një kandidateje të një subjekti politik.

Për këtë rast, materialet iu referuan SPAK për hetime të mëtejshme, ndërkohë që ndaj 63-vjeçarit rëndon akuza “Korrupsioni aktiv në zgjedhje”.

Ndërkohë, edhe në Lushnjë është regjistruar një rast tjetër i shkeljeve zgjedhore. Specialistët për Hetimin e Krimeve në Komisariatin e Lushnjës kanë referuar në Prokurori materialet për nisjen e procedimit penal ndaj shtetasit Stefan Prença, 27 vjeç, banues në fshatin Bubullimë.

Prença është nënkryetar i Partisë Demokratike për zonën e Bubullimës, raporton noa.al. Ai është denoncuar nga shtetasi J. Ç., 28 vjeç, i cili ka deklaruar se është kanosur përmes platformës “Messenger” për dhënien e votës.

Edhe ky rast i është referuar SPAK, nën akuzën “Kanosja apo dhunimi ndaj pjesëmarrësve në zgjedhje”. /noa.al